Nagturuan ang mga Irrigarator’s Association at ang National Irrigation Administration NIA kung sino ang may pagkukulang o dapat sisihin hinggil sa problema sa patubig sa mga sakahan sa lalawigan ng Camarines Norte kaninang umaga (May 6, 2014) sa regular session ng Sangguniang Panlalawigan.
Dumalo sa naturang sesyon ang mga miyembro ng Federation of Irrigator’s Association of Camarines Norte sa pangunguna ng kanilang presidente na si Mr. Tony Villafuerte.
Reklamo ng mga magsasaka na walang maayos na patubig na dumadaloy sa kanilang mga sakahan dahilan para masira ang kanilang mga pananim at humina ang ani. Ang kakulangan din sa tubig ang pinaniniwalaang dahilan ng pagdami ng mga peste sa palay katulad ng Army Worm. Anila, wala nang tubig na nakakarating sa dulo at hanggang sa mga nauunang dinadaluyan lamang nakakarating ang tubig mula sa irigasyon.
Sagot naman ni Engr. Rogelio King ng NIA, walang disiplina ang ilang mga magsasaka. Anya, hinaharangan ng mga magsasaka na nasa unahan ang mga irrigasyon para makasok sa kanila ang tubig na nagiging dahilan para hindi na ito makarating sa dulo. Dapat anya, ayun kay King na dapat ay hayaan munang makarating sa dulo ang tubig pababa papunta sa unahan para lahat ay makinabang.
Sa kasalukuyan ay ipinatutupad ang scheduling ng water distribution ng NIA bagay na hindi kumbinsido ang mga magsasaka.
Kinuwestyon din ni Board Member Romeo Marmol ang scheduling na ipinatutupad na nangangahulugan anya na kulang ang patubig.
Ganito rin ang naging punto ni Board Member Gerry Quinonez. Sinabi ni Quinonez na hindi dapat nagkakaroon ng phasing ng water supplication dahil maaaring hindi ito sumapat sa pangangailangan ng mga sakahan upang magkaroon ng sapat na ani.
Iminungkahi ngayon nina Marmol at Quinonez na magkapaghanap ng karagdagan pang mapagkukunan ng tubig gayung tila lumalabas na kulang talaga ang kasalukuyang source ng tubig ng NIA.
Isa sa tinitingnan ngayon ng NIA at ng SP ay ang Mt. Labo na isa sa pinakamalakas na source ng tubig inumin ng mga mamamayan ng Camarines Norte.
Ayun kay Quinonez, malaking bagay ang kanilang inaprubahang ordinansa hinggil sa pag poproteksyon sa mga water reservoir sa mga kabundukan ng lalawigan dahilan sa hindi lamang inuming tubig ang maaari nitong maitulong sa mamamayan kundi maging para sa mga sakahan.
Sa mga susunod na sesyon ay nakatakdang magsagawa ng pagkilos ang Sangguniang Panlalawigan upang sa lalong madaling panahon ay matugunan ang hinaing ng mga magsasaka sa kakulangan sa patubig.
Nag uulat,
Donde Consuelo/Ricky Pera
Photos by: Jeffrey De Leon
CNNews Correspondents
