San Lorenzo Ruiz, Camarines Norte (Agosto 30, 2016) – Arestado ang ika-6 sa Municipal Drug Watchlist ng Philippine National Police (PNP) nang hainan ito ng search warrant nitong Agosto 27, 2016 pasado alas-12 ng madaling-araw sa bayan ng San Lorenzo Ruiz.
Batay sa ulat ng San Lorenzo Ruiz Municipal Police Station (MPS), tinungo ng mga operatiba mula sa Camarines Norte Provincial Intelligence Branch (CNPIB), Camarines Norte Public Safety Company (CNPPSC), Philippine Drug Enforcement Agency (PDEA), at San Lorenzo Ruiz MPS ang tahanan ng suspek na si Charlie Estravez y Carrascal, at residente ng Brgy. Mampurog, San Lorenzo Ruiz, Camarines Norte bitbit ang Search Warrant Number. D-2016- 157, na ipinalabas ni Judge Arniel A. Dating ng Regional Trial Court Branch 41, Daet, Camarines Norte.
Nagresulta ang naturang operasyon sa pagkakakumpiska sa 4 na small heat sealed transparent plastic sachet na naglalaman ng white crystalline substance na pinaghihinalaang methamphetamine hydrochloride o“Shabu”; 3 small heat sealed transparent plastic sachet na naglalaman ng marka ng white crystalline substance na pinaghihinalaang methamphetamine hydrochloride o “Shabu”; mga aluminim foils; at 3 lighters.
Kasalukuyan nang nasa kustodiya ng San Lorenzo Ruiz MPS ang suspek habang inihahanda na ang kasong paglabag sa Republic Act 9165 (Comprehensive Dangerous Drug Act of 2002) na isasampa laban dito.
Edwin Datan, Jr.
Camarines Norte News
