Abril 20, 2018, Daet, Camarines Norte – Nagpamalas ng natatanging ganda, husay sa pagrampa at talino ang labing walong (18) kabataang kandidata sa ginanap na pageant night ng Little Miss Camarines Norte 2018 kamakalawa sa Agro Sports Center, Daet, Camarines Norte.
Nasungkit ni Jannel Chavez ng MCE Academy ang pinakamataas na titulo na Little Miss Camarines Norte 2018 habang nakuha naman ni Jbelle Xyriel Patawaran ng Chung Hua High School ang titulong Little Miss Bantayog 2018.
Itinanghal din bilang Little Miss Tourism 2018 si Precious May Margase ng Brgy. Camambugan, Daet habang nakakuha rin ng puwesto sa top 5 sina Romaine Chastity A. Sto. Domingo ng LGU Daet bilang first runner up at Sharica Mae De Vera ng Montessori Children’s House of Learning bilang 2nd runner up.
Samantala, nakuha naman ni Princess Niña Mae Zantua ng LGU Talisay ang titulo na Little Miss Kiwanis 2018.
Magsisilbi bilang Ambassadress of Goodwill ng Kiwanis Club of Reina Daetena ang hinirang na Little Miss Kiwanis 2017 habang magiging katuwang naman ng Provincial Government of Camarines Norte ang mga nagwaging Little Miss Bantayog 2017, Little Miss Tourism 2017 lalong lalo na ang nanalong Little Miss Camarines Norte 2017 sa mga programa at proyekto nito partikular na ang para sa mga kabataan.
Ang nasambit na patimpalak ay bahagi ng ipinagdiriwang na 98th Founding Anniversary ng lalawigan ng Camarines Norte at 14th bantayog Festival.
Pinangunahan ito ng Pamahalaang Panlalawigan ng Camarines Norte sa pamamagitan ng Provincial Tourism Operations Division katuwang ang Kiwanis Club of Reina Daeteña.
Camarines Norte News
