HINIHINALANG TULAK NG DROGA, NASAKOTE NG PULISYA SA BUY-BUST OPERATION SA DAET

HINIHINALANG TULAK NG DROGA, NASAKOTE NG PULISYA SA BUY-BUST OPERATION SA DAET

Nasakote ang isang hinihinalang tulak ng iligal na droga sa matagumpay na buy-bust operation ng pinagsanib na pwersa ng Daet Municipal Police Station (lead unit), katuwang ang PPDEU/CNPIU at sa pakikipagtulungan ng PDEA Region V.

Ang operasyon ay isinagawa alas-3:33 ng hapon noong Enero 22, 2025, sa Bicierra St., Purok 3, Barangay I, Daet, Camarines Norte.

Kinilala ang suspek bilang si alyas “David,” 36 taong gulang, isang bar employee at residente ng nasabing lugar. Ayon sa ulat, nakabili ang poseur buyer mula kay David ng isang plastik na pakete ng hinihinalang shabu na hudyat upang agad arestuhin ng mga operatiba.

Nakumpiska sa operasyon ang ilang pakete ng hinihinalang shabu na kasalukuyang inaalam pa ang eksaktong bigat at halaga.

 Ang proseso ng imbentaryo at pagmamarka ng mga ebidensya ay nasaksihan ng mga opisyal ng Barangay I at isang media representative.

Ipinaalam sa suspek ang kanyang mga karapatan at dinala siya sa Camarines Norte Provincial Hospital para sa kaukulang medikal na pagsusuri. Sa kasalukuyan, nasa kustodiya na ng Daet MPS si “David” para sa karampatang dokumentasyon at disposisyon.

Patuloy ang pinaigting na kampanya ng PNP laban sa iligal na droga sa probinsya upang mapanatili ang kapayapaan at kaligtasan ng komunidad.

Source: CNPPO PIO